Tungi rejim
Mijoz tovarni qaytardi — nima qilaman?
Qisqacha javob: Sotuvlar ro'yxatidan mijozning chekini toping va qaytarishni rasmiylashtiring. Tovar omborga qaytadi, pul mijozga qaytariladi.
Qaytarish va bekor qilish farqi
Bu ikkisini chalkashtirmaslik kerak:
| Qaytarish | Bekor qilish | |
|---|---|---|
| Qachon | Sotuv to'g'ri bo'lgan, mijoz keyin qaytargan | Sotuv umuman xato bo'lgan |
| Misol | Kiyim o'lchami to'g'ri kelmadi | Xato tovar urilgan, chek ikki marta chiqqan |
| Hisobotda | Qaytarish sifatida ko'rinadi | Sotuv butunlay chiqarib tashlanadi |
Batafsil: Xatoni bekor qilish.
Qadamlar
- Sotuvlar ro'yxatini oching.
- Mijozning chekini toping — chek raqami, vaqti yoki summasi bo'yicha.
- Qaytarish amalini tanlang.
- Qaysi tovar qaytayotganini belgilang. Chekning bir qismini ham qaytarish mumkin.
- Sababini yozing va tasdiqlang.
Nima bo'ladi
- Tovar omborga qaytadi — qoldiq oshadi;
- Pul mijozga qaytariladi va kassadan chiqadi;
- Foyda tegishlicha kamayadi;
- Qarzga sotilgan bo'lsa — mijozning qarzi kamayadi.
To'plam qaytarilsa, sotuv vaqtida saqlangan tarkib bo'yicha uning komponentlari omborga qaytadi. Kassada tarkib o'zgartirilgan bo'lsa ham, tizim hozirgi retseptni emas, aynan sotilgan nusxani tiklaydi.
Nasiyaga sotilgan tovar qaytsa
Bo'lib to'lashga berilgan sotuvdan tovar qaytarilsa, mijozning qarzi kamayadi va grafik ham o'sha zahoti qayta hisoblanadi. Sizdan qo'shimcha hech narsa talab qilinmaydi.
| Nima | Qanday |
|---|---|
| To'langan badallar | O'zgarmaydi — ular allaqachon to'langan, tarix |
| To'lanmagan badallar | Qolgan qarz shular orasida teng bo'linadi; tiyin qoldig'i oxirgi badalga qo'shiladi |
| Muddat | O'zgarmaydi — oylar soni ham, sanalar ham o'sha-o'sha |
Ustama ham qaytadi. Mijoz o'zida qolmagan tovar uchun bo'lib to'lash ustamasini to'lamaydi: qaytarilgan tovarga tegishli ustama ulushi qarzdan yechiladi. Bu pul emas — kassadan hech narsa chiqmaydi, faqat qarz kamayadi (mijoz ustamani hali to'lamagan edi).
Misol: 5 000 000 so'mlik tovar 6 600 000 so'mga, 6 oyga berilgan. Mijoz tovarning 2/5 qismini qaytardi → tovar puli 2 000 000 va ustamaning 2/5 qismi 640 000 hisobdan chiqadi. Shartnoma summasi 3 960 000 bo'ladi, qolgan badallar shu raqamga moslanadi.
Shartnoma kartochkasida bugungi summa ko'rinadi, ostida esa «shartnoma shuncha edi · shuncha qaytarildi» degan qator. Qarz to'liq yopilganda shartnoma «Yopilgan» bo'ladi.
Mijoz to'lagan puldan ko'p tovar qaytarsa do'kon unga qarzdor bo'lib qoladi. Bu mijoz kartochkasida ochiq ko'rinadi: balans manfiy bo'ladi («biz qarzdormiz») va pulni kontragent to'lovi orqali qaytarasiz. Grafikda esa faqat to'langan badallar qoladi, keyingilari o'chadi — to'lanadigan narsa qolmagan.
Xato qaytarish rasmiylashtirdim
Qaytarishni bekor qilish mumkin — hammasi joyiga qaytadi: tovar yana sotilgan holatga o'tadi, pul qaytariladi va mijozning qarzi tiklanadi. Nasiya bo'lsa, ustama va badallar grafigi ham aynan avvalgi holiga qaytadi.
Bekor qilingan qaytarish ro'yxatdan yo'qolmaydi — u «bekor qilingan» deb belgilanib turadi, kim va nima uchun bekor qilgani ko'rinadi. Lekin u endi hech qayerda hisobga olinmaydi:
| Nima | Natija |
|---|---|
| Hisobotlar | Bekor qilingan qaytarish qaytarish sifatida sanalmaydi |
| Qayta qaytarish | O'sha tovarni yana qaytarish mumkin — joyi bo'shaydi |
| Pul | Keyingi qaytarishda mijoz to'liq summani oladi |
| Chekni o'chirish | Sotuvni bekor qilishga endi to'sqinlik qilmaydi |
Faqat eng oxirgi qaytarishni bekor qilish mumkin. Bir nechta qaytarish bo'lgan bo'lsa, oxirgisidan boshlab teskari tartibda bekor qiling.
Agar mijozga keshbek berilgan bo'lsa, qaytarishda u ham hisobga olinadi — qaytarilgan tovarga to'g'ri keladigan keshbek mijozning keshbek hisobidan yechiladi. Uning qarzi (balansi) bunda o'zgarmaydi: keshbek va qarz alohida yuritiladi.
Bekor qilingan chekdan qaytarish
Sotuvning o'zi bekor qilingan bo'lsa, undan qaytarish qilib bo'lmaydi — dastur «Bu sotuv bekor qilingan» deb ogohlantiradi. Bu to'g'ri: sotuv bekor qilinganda tovar allaqachon omborga qaytgan va pul ham qaytarilgan, ya'ni qaytaradigan narsa qolmagan.
Yaroqsiz tovar qaytsa
Agar qaytgan tovar sotib bo'lmaydigan holatda bo'lsa (buzilgan, yaroqsiz), uni omborga qaytargandan keyin alohida hisobdan chiqarish kerak — aks holda qoldiqda bor ko'rinadi, lekin aslida sotib bo'lmaydi.
Batafsil: Tovarni hisobdan chiqarish.
Tez-tez uchraydigan savollar
Chek yo'qolgan bo'lsa qaytara olamanmi? Ha. Sotuvlar ro'yxatidan sana, summa yoki mijoz bo'yicha topish mumkin.
Qaytarishni internetsiz qilsam bo'ladimi? Kassa dasturi offline holatda ham qabul qiladi, internet qaytganda serverga yuboradi.
Mijozga naqd emas, kartaga qaytarsam? To'lov turini tanlash mumkin. Lekin hisob to'g'ri bo'lishi uchun mijozga qanday qaytargan bo'lsangiz, shuni tanlang.
Sotuvchining foiziga ta'sir qiladimi
Ha, agar sotuvchiga sotuvdan foiz belgilangan bo'lsa. Qaytarilgan tovar uchun berilgan foiz keyingi oy oyligidan ushlab qolinadi va u yerda alohida qator bo'lib ko'rinadi — jarima emas, sababi yozilgan holda. Kassirdan hech narsa talab qilinmaydi: qaytarishni odatdagidek qilaverasiz.
Batafsil: Xodimlar oyligi.