Narx stikerini qanday chop etaman?

Qisqacha javob: my.topsavdo.uz → Ombor → Narx stikeri → tovarlarni tanlang → nechta nusxa kerakligini kiriting → chop eting.

Qadamlar

1. Ombor → Narx stikeri bo'limini oching.
2. Tovarlarni qidirib qo'shing — bir vaqtda bir nechtasini tanlash mumkin.
3. Har biri uchun nusxa sonini kiriting yoki «Qoldiq sonicha» ni tanlang.
4. Ko'rinishini tekshiring va chop eting.

Stikerni ombordagi qoldiq sonicha chiqarish

O'ng tomondagi «Nusxalar soni» panelida ikki tugma bor:

Tanlov	Nima bo'ladi
Har biriga 1 ta	Har bir tovarga bittadan stiker
Qoldiq sonicha	Har bir tovarga ombordagi qoldig'i qancha bo'lsa shuncha stiker

Qoldiq sonicha tanlansa, tovar ro'yxatida har bir tovarning yonida nechta stiker chiqishi darhol yoziladi (Qoldiq: 24 ta → 24 ta stiker). Keyin istalgan tovarning sonini qo'lda o'zgartirsangiz ham bo'ladi — o'zgartirganingizdan keyin «Sonlarni qoldiqqa qayta tenglash» tugmasi hammasini yana qoldiqqa qaytaradi.

Uchta holat alohida ko'rsatiladi:

• Kasrli qoldiq (kilogramm, litr, metr): 3,457 kg → 3 ta stiker — butun songa pastga yaxlitlanadi. Qoldiq 1 dan kam bo'lsa (0,4 kg) baribir 1 ta chiqadi, chunki tovar bor.
• Qoldig'i yo'q tovar: soni 0 bo'ladi va stiker chiqmaydi. Bunday tovarlar ro'yxat ustida qizil yozuv bilan sanab o'tiladi — bilib turib chop etasiz.
• Qoldig'i juda ko'p tovar: bir marta chop etishda bitta tovardan eng ko'pi 500 ta stiker chiqadi. Qoldiq bundan ko'p bo'lsa, nechtasi chiqmagani aniq yoziladi (qoldiq 564 ta → 500 ta chiqadi, 64 tasi chiqmaydi) — qolganini ikkinchi marta chop etasiz.

Bir marta chop etishda jami 500 ta stiker chegarasi bor. Undan oshsa tugma o'chadi va nechta ortiqcha ekani yoziladi.

Ko'p filialli do'kon

Qoldiq o'sha paytda tanlangan filial bo'yicha olinadi — panelda filial nomi yozib qo'yiladi. Filialni almashtirsangiz tanlov tozalanadi, chunki har filialning tovari va qoldig'i o'ziniki.

Xariddan kelib chop etsangiz (Xaridlar → stiker chiqarish) oynada uchta tanlov chiqadi: har biriga 1 ta, qabul qilingan sonicha va qoldiq sonicha. Har birining yonida nechta stiker tayyorlanishi yozilgan.

Stikerda nima bo'ladi

Odatda: tovar nomi, narxi va shtrix-kod. Qaysi ma'lumot chiqishini Sozlamalar → Stiker sozlamalari → Vizual muharrir dagi Qatlamlar ro'yxatida ko'z belgisi bilan yoqasiz yoki yashirasiz (do'kon nomi, SKU, PLU ham shu yerda).

Qaysi turdagi shtrix-kod chiqadi

Stikerga qaysi turdagi kod chiqishini tanlaysiz:

Tur	Qachon
Dona	Oddiy donali tovar
Blok	Paket/quti bilan sotiladigan tovar
Kg/metr donasi	Kilogramm yoki metr bilan o'lchanadigan tovarning bitta donasi (masalan bitta non)
Bo'lak	Donali tovarning bo'lagi

Kg/metr donasi va Bo'lak tanlansa, stikerda o'sha turning o'z narxi chiqadi — butun tovar narxi emas.

Turni ikki joyda tanlash mumkin: Narx stikeri sahifasida va Mahsulotlar ro'yxatidan tovarni belgilab «Stiker chop etish» tugmasini bosganda ochiladigan oynada. Tezkor oynada faqat tanlangan tovarlarda haqiqatan mavjud turlar ko'rsatiladi.

Tanlangan tovarlarda o'sha turdagi kod bo'lmasa, ular ro'yxatdan tushib qoladi va sabab ko'rsatiladi — xabarda o'sha tovarlarda qaysi tur borligi ham yoziladi, shunga qarab turni almashtirasiz.

Ulgurji va chakana narxni bitta stikerda chiqarish

Shablonga narxlarni alohida element qilib qo'yasiz. Sozlamalar → Stiker sozlamalari → Vizual muharrir → «Element qo'shish»:

Element	Nima chiqadi
Chakana	Tovarning chakana (sotuv) narxi
Ulgurji	Ulgurji narx
Blok	Bitta blok (paket/quti) narxi
Dona	Kg/metrli tovarning bitta donasi narxi
Bo'lak	Bitta bo'lak narxi
Matn	O'zingiz yozgan o'zgarmas matn (masalan «Aksiya»)

Element qo'shilgach uni sichqoncha bilan kerakli joyga surasiz. Bitta stikerga bir nechta narx qo'yish mumkin — masalan chapga chakana, o'ngga ulgurji.

Qaysi narx ekanini belgilash

Har bir narx elementining o'z yozuvi bor. Elementni tanlang va o'ng paneldagi «Yozuv» maydoniga yozing — stikerda Ulgurji 12 000 soʻm ko'rinishida chiqadi. Yozuvni bo'sh qoldirsangiz faqat summa chiqadi.

Yozuv 40 belgigacha.

Narx belgilanmagan bo'lsa

Tovarda o'sha narx yo'q bo'lsa (masalan ulgurji narx kiritilmagan), element butunlay chiqmaydi — stikerda yolg'iz «Ulgurji» yozuvi qolib ketmaydi. Chop etishdan oldin qaysi tovarlarda narx yetishmasligi haqida xabar ko'rsatiladi.

Chakana narx ham shunday: tovar «Narx yo'q» holatida bo'lsa (kartochkada sotuv narxi yozilmagan), stikerda narx qatori chiqmaydi — «0 so'm» deb yozilgan stiker tovarni bepul deb ko'rsatardi. Ro'yxatda bunday tovarning narxi o'rnida «Narx yo'q» turadi. Batafsil: Narxni hali bilmasam.

Narxda tiyin bo'lsa

Stikerdagi narx chekdagi bilan bir xil yoziladi — butun so'mga yaxlitlanadi (0,50 va undan yuqorisi yuqoriga): 8 260,50 so'mlik tovar stikerida 8 261 soʻm, kassa chekida ham «x 8 261». Tiyin stikerda yozilmaydi.

Ulgurji narx va xodim ruxsati

Ulgurji narx — maxfiy ma'lumot. Xodimda «Tannarx va foydani ko'rish» ruxsati bo'lmasa:

• muharrirda «Ulgurji» elementini qo'sha olmaydi;
• ulgurji narxli shablon bilan chop eta olmaydi — sabab yozilgan xabar chiqadi.

Ruxsatni do'kon egasi Xodimlar bo'limidan beradi.

Eski shablonlarga ta'siri

Yangi elementlar o'zingiz qo'shsangizgina paydo bo'ladi. Mavjud shablonlaringiz o'zgarmaydi.

Stikerga do'kon logotipini qo'yish

Stikerga do'koningiz logotipi chiqadi — alohida rasm yuklash shart emas.

1. Logotipni bir marta yuklang: Sozlamalar → Do'kon sozlamalari (buni do'kon egasi qiladi). Chekda chiqadigan logotip ham shu.
2. Sozlamalar → Stiker sozlamalari → Vizual muharrir → «Element qo'shish» → Logotip.
3. Logotip stikerdagi bo'sh joyga tushadi. Bo'sh joy bo'lmasa u chap-yuqori burchakka tushadi, uni yopib qo'ymasligi uchun do'kon nomi, mahsulot nomi va narx o'ngga suriladi. So'ng logotipni sichqoncha bilan kerakli joyga suring va burchagidan tortib kattalashtiring. Rasm qutiga nisbatini buzmasdan sig'adi.

Ko'p filialli do'konda har filialning o'z logotipi chiqadi — qaysi filial uchun chop etilsa, o'shaniki.

Namuna printer chiqaradigan ko'rinishda

Stiker printeri faqat qora nuqta bosadi — rang va kulrang yo'q. Shuning uchun muharrirda logotip darhol qora-oq nuqtalar ko'rinishida chiqadi: qog'ozga aynan shu nuqtalar tushadi. Kattalashtirib (lupa) nuqtalarni ko'rishingiz mumkin.

Rangli logotipni qora-oqqa o'girishni dastur o'zi tanlaydi (odatda hech narsa sozlash shart emas):

• Oddiy logotip va yozuv — har qanday rang (ko'k, to'q sariq, hatto och sariq) to'liq qora, fon oq bo'lib chiqadi: qirralari tiniq, xira nuqtalar yo'q. Ingichka chiziqlar (ramka, ingichka shrift) kichik logotipda ham yo'qolmaydi.
• To'q yozuv yoki shakl rangli fon ustida (masalan sariq nishondagi qora yozuv) — to'q joy qora, rangli fon siyrak nuqtalar bilan chiqadi, yozuv atrofida ingichka oq hoshiya qoladi. Aks holda yozuv fon bilan qo'shilib, bitta qora dog' bo'lib qolardi.
• Fotosurat — soyalar nuqtalar zichligi bilan chiqadi (kontrasti avval kuchaytiriladi, xira bo'lmasin).
• Shaffof fondagi oq logotip (qorong'i sayt uchun chizilgan) — oq qog'ozda ko'rinmay qolardi, shuning uchun uning shakli qora qilib chiqariladi.

Logotipni tanlasangiz o'ng panelda qaysi usul tanlangani yoziladi va ikki sozlama chiqadi:

Sozlama	Nima qiladi
Qora-oqqa o'girish	Avtomatik (tavsiya) — usulni logotipning o'ziga qarab tanlaydi. Qora-oq — har nuqta yo to'liq qora, yo oq (matnli logotip uchun eng tiniq). Nuqtali — rang va soyalar nuqtalar zichligi bilan (fotosurat uchun)
Qoralik darajasi	50% — logotipning o'ziga qarab tanlangan chegara. Ingichka joylari yo'qolsa — oshiring; qorayib, detallari bir-biriga qo'shilib ketsa — kamaytiring

Avval saqlangan shablonlarda logotip ham qayta sozlamasdan yangi (avtomatik) usulda chiqadi. Faqat oldin «Nuqtali soya»ni ataylab o'chirgan bo'lsangiz — «Qora-oq» usuli saqlanib qoladi.

Logotip chiqmasa

• Do'konda logotip yuklanmagan bo'lsa muharrirda logotip o'rnida punktir quti va «Logotip yo'q» yozuvi turadi. Chop etishda stiker logotipsiz chiqadi va bu haqda ogohlantirish ko'rsatiladi.
• Logotip hali yuklanayotgan paytda «Chop etish» bosilsa, bir soniyadan keyin qayta bosishingiz so'raladi — aks holda stiker logotipsiz chiqib ketardi.
• Logotip katta stikerda biroz «pog'onali» ko'rinsa — do'kon logotipi 400 pikselgacha saqlanadi, bu taxminan 50 mm lik logotipga yetadi.

Yangi shablon yaratish

Sozlamalar → Stiker sozlamalari da chap tomonda «Yangi shablon o'lchami» ro'yxatidan stikeringiz o'lchamini tanlang va «Yangi shablon» tugmasini bosing. Ro'yxatda do'konda ko'p ishlatiladigan o'lchamlar bor (30×20 dan 80×40 gacha). Stikeringiz boshqa o'lchamda bo'lsa — istalganini tanlang va pastdagi Kenglik va Balandlik kataklariga o'z o'lchamingizni yozing.

Printerni saytga ulash kerakmi, degan savolga javob sahifa tepasidagi «?» belgisida.

Stiker o'lchamini sozlash

Sozlamalarda stiker eni va bo'yi ko'rsatiladi. Bu haqiqiy stiker o'lchamiga mos bo'lishi shart — aks holda matn siljib chiqadi yoki qirqiladi.

Stikerni aylantirish (0°, 90°, 180°, 270°) — butun stiker yonboshlatib chop etiladi (masalan 35×60 lik stikerda yozuv uzun tomon bo'ylab ketishi uchun 90°).

Oraliq — stikerlar orasidagi bo'shliq. Saytdan chop etishda stikerning pastidan ham shuncha joy (kamida 1 mm) bo'sh qoldiriladi: printer stikerni biroz siljitsa ham shtrix-kod stikerdan chiqib ketmaydi. Muharrirda bu joy alohida belgilanmaydi — qog'ozdagidek oddiy oq chekka bo'lib turadi. Elementni pastga sursangiz, u shu bo'sh joy boshlanadigan yerda to'xtaydi: element surilayotgan yoki o'lchami o'zgartirilayotgan paytda o'sha chegara ingichka qizil punktir chiziq bilan ko'rinadi. Sichqonchani qo'yib yuborsangiz chiziq yo'qoladi.

Eni, bo'yi va shrift kataklariga noto'g'ri son yozilsa (masalan kenglik 10 mm dan kam) u qo'llanmaydi — katakdan chiqqaningizda oxirgi to'g'ri son qaytadi.

Sozlagandan keyin bitta sinov stiker chop eting va o'lchab tekshiring.

Vizual muharrirda ishlash

Sozlamalar → Stiker sozlamalari → Vizual muharrir da elementni sichqoncha bilan surasiz, burchagidan tortib kattalashtirasiz.

Avtomatik va qo'lda joylashuv

Yangi shablon va hali hech narsasi surilmagan eski shablon avtomatik joylashuvda bo'ladi: nom, narx va boshqa yozuvlar yuqoridan ketma-ket turadi, shtrix-kod qolgan joyni oladi. Nom uzun bo'lsa (ikki qator) narx va shtrix-kod o'zi pastroq tushadi. Muharrir bunday shablonni qog'ozga qanday chiqsa, aynan shunday ko'rsatadi — tepada «Avtomatik joylashuv» izohi turadi.

Biror elementni sursangiz, o'lchamini yoki burchagini o'zgartirsangiz, yangi element qo'shsangiz — stiker qo'lda joylashuvga o'tadi: har element o'z joyida qoladi. Bu paytda boshqa elementlar ham bir-ikki mm siljishi mumkin — nomga uzun (ikki qatorli) nom ham sig'adigan joy ajratiladi. Namunada hammasi ko'rinib turadi; «O'zgarishlarni saqlash» ni bosmaguningizcha qog'ozda hech narsa o'zgarmaydi.

Qo'lda joylashuvdan qaytish uchun asboblar panelidagi «Avtomatik joylashuvga qaytarish» (↺) tugmasini bosing (qo'shilgan narx, matn va logotip elementlari olib tashlanadi).

Nom shrifti, Narx shrifti va Shtrix-kod balandligi kataklari faqat avtomatik joylashuvda ko'rinadi. Qo'lda joylashuvda har elementning o'lchami muharrirda — elementni tanlab «Kattaligi» surgichi bilan yoki burchagidan tortib o'zgartirasiz.

Shtrix-kod o'lchami va ostidagi raqamlar

Qo'lda joylashuvda shtrix-kod o'z qutisini to'ldiradi:

• qutining eni — chiziqlar yo'g'onligi. Quti qancha keng bo'lsa, skaner shuncha oson o'qiydi;
• qutining bo'yi — chiziqlar uzunligi. Joy tejash uchun qutini pasaytiring (Balandlik katagi yoki qutining pastki chetidan torting): shtrix-kod eni o'zgarmaydi, faqat chiziqlar qisqaradi.

«Kattaligi» surgichi qutining enini ham, bo'yini ham birga o'zgartiradi — kichraytirsangiz shtrix-kod torayadi. Shtrix-kodni faqat qisqartirish kerak bo'lsa bo'yini o'zgartiring.

Sozlamalarning «Shtrix-kod» bo'limidagi «Shtrix-kod ostida raqamlarni chiqarish» belgisini o'chirsangiz, chiziqlar ostidagi raqamlar chop etilmaydi va ularning joyini chiziqlar egallaydi. Skaner raqamlarni emas, chiziqlarni o'qiydi — shuning uchun o'qilishi yomonlashmaydi. Belgi avtomatik joylashuvda ham ishlaydi; u yerda chiziqlar uzunligi Shtrix-kod balandligi katagida.

Chiziqlar 2 mm dan qisqarmaydi: undan past qutida shtrix-kod sig'ish uchun torayadi (namunada ko'rinadi).

Muharrir asboblari

• Strelka tugmalari tanlangan elementni ekranda ko'ringan tomonga suradi (Shift bilan — kattaroq qadam). Butun stiker 90° ga aylantirilgan shablonda ham → o'ngga suradi. Elementni o'ng tarafdagi Qatlamlar ro'yxatidan tanlasangiz ham strelkalar ishlaydi.
• Esc — tanlovni olib tashlaydi, sozlamalar oynasi yopilmaydi.
• To'r tugmasi — bitta: yoqilganda muharrirda to'r ko'rinadi va elementlar to'rga yopishib suriladi; o'chirilsa erkin suriladi.
• «4» tugmasi stikerni 4 ta tik qismga bo'lib ko'rsatadi, «4×» tanlangan elementni to'rt qismning har biriga joylaydi (bitta stikerda 4 ta kichik yorliq). Shablonda 4 qismga joylangan element bo'lsa qism chiziqlari o'zi yoqiladi, oddiy stikerda o'chiq turadi.
• Joylashuv (mm) — tanlangan elementning X, Y, Kenglik va Balandlik qiymatlari millimetrda. X yoki Y yozsangiz element o'lchami saqlanadi; element stiker chetiga (pastda — «Oraliq» chekkasiga) yetsa to'xtaydi.
• Kattaligi — element va ichidagi yozuv birga kattalashadi yoki kichrayadi. Surgich chegarasi o'sha elementga qarab ko'rsatiladi: masalan stiker eniga yoyilgan nom 108% dan kattalasha olmaydi — undan kattasi stikerga sig'maydi.
• Aylantirish (90°) — element qutisi bilan birga buriladi: yozuv kichraymaydi, faqat yo'nalishi o'zgaradi. Burilgan element stikerga sig'masa, sig'guncha kichraytiriladi.
• Qatlamlar ro'yxatida har element yonida uning turi belgisi turadi (do'kon, nom, narx, shtrix-kod...).
• Saqlanmagan o'zgarish bo'lsa pastda «Saqlanmagan o'zgarishlar bor» yoziladi. Shu paytda boshqa shablonni, «Yangi shablon» yoki **«Nusxalash»**ni bossangiz, o'zgarishlar yo'qolishidan oldin so'raladi.
• Muharrirdagi namuna chop etiladigan stiker bilan bir xil (avtomatik joylashuvda ham, qo'lda joylashuvda ham): elementlar joyi, shtrix-kod o'lchami va shrift qog'ozdagidan 0.3 mm dan ko'p farq qilmaydi. «Narx stikeri» sahifasidagi namuna ham shunday. Baribir bitta sinov chop etib ko'ring.

Nom yoki narx to'liq chiqmayapti

Stikerga sig'maydigan matnning shrifti avtomatik kichrayadi — narx ham, nom ham to'liq chiqadi. Juda uzun nom eng kichik shriftda ham sig'masa, oxiri "..." bilan tugaydi.

Shu sabab ba'zan bir xil shablonda turli tovarlarning narxi turlicha kattalikda chiqadi: uzun narx ("1 250 000 soʻm") qisqarog'iga qaraganda kichikroq yoziladi.

Agar shrift o'zingizga juda kichik tuyulsa:

• mahsulot nomini qisqartiring (kassada tushunarli bo'lsa yetarli);
• yoki kattaroq stiker ishlating;
• yoki sozlamalarda narx/nom uchun ajratilgan joyni kattalashtiring.

Chop etishdan oldin bitta sinov chiqarib ko'rish har doim foydali.

Bir nechta tovarni birga chop etsam, faqat oxirgisi to'g'ri chiqyapti

Bu tuzatilgan xato edi: erkin joylashuvli (o'zingiz joylashtirgan) shablonda pastki chekkaga tegib turgan element — odatda narx — faqat eng oxirgi stikerda chiqardi. Ilova yangilangandan keyin hamma stikerda bir xil chiqadi.

Xuddi shunday xato butun kontenti 90° yoki 270° ga aylantirilgan shablonda ham bor edi: oxirgisidan boshqa stikerlarda matn bir necha millimetr surilib, tepadan qirqilardi, logotip esa ba'zi stikerda umuman chiqmasdi. Bu ham tuzatilgan.

Yonboshlatilgan stikerda yozuvlar juda mayda chiqyapti

Bu tuzatilgan xato edi: butun stiker 90° yoki 270° ga aylantirilgan va avtomatik joylashuvdagi shablonda (masalan 35×60, 90°) do'kon nomi, tovar nomi va narx sozlamadagidan qariyb ikki barobar mayda chop etilardi — shtrix-kod esa to'g'ri chiqardi. Ilova yangilangandan keyin yozuvlar sozlamadagi shrift o'lchamida chiqadi. Shablonni qayta sozlash shart emas.

Shtrix-kod ostidagi raqamlar chiqmayapti

Bu tuzatilgan xato edi: o'zingiz joylashtirgan (vizual muharrirda saqlangan) shablonni saytdan chop etganda shtrix-kod ostidagi raqamlar qog'ozga chiqmasdi, chiziqlarning tepasi va pasti esa qirqilardi — namunada hammasi ko'rinib turardi. Ilova yangilangandan keyin shtrix-kod raqamlari bilan, namunadagidek chiqadi.

Shtrix-kod o'qilmayapti

• Stiker sifati past bo'lsa (rangi ochiq) — printer boshini tozalang yoki qorong'ilik darajasini oshiring;
• Shtrix-kod juda tor bo'lsa — muharrirda uning qutisini kengroq qiling (bo'yini emas). Joy yetmasa qutini pasaytiring yoki raqamlarni o'chiring — yuqoridagi «Shtrix-kod o'lchami va ostidagi raqamlar» bo'limiga qarang. Bu ham yetmasa stiker o'lchamini kattalashtiring;
• Kod chekkaga taqalib qolgan bo'lsa — chekka bo'shliqni oshiring.

Ilgari qo'lda joylashuvda shtrix-kod qutida o'z nisbatini saqlardi: qutini pasaytirsangiz shtrix-kod ham torayib, skaner o'qimay qolardi; kengaytirish uchun esa qutini baland qilish kerak edi. Bu tuzatildi — endi shtrix-kod qutining enini to'ldiradi. Saqlangan shablonlarda ham shtrix-kod o'zi kengayadi, qayta sozlash shart emas (bir marta sinov chop etib ko'ring).

Keyingi qadam

• Stiker printeri
• Mahsulot qo'shish