Tungi rejim
Hisobim qaysi qurilmalarda ochiq?
Qisqacha javob: saytda Sozlamalar → Profil → «Kirilgan qurilmalar» (telefonda Yana → Profil → «Kirilgan qurilmalar»). U yerda hisobingiz ochiq turgan har bir kompyuter, telefon va brauzer, ulangan Telegram bot va AI kalitlari ko'rinadi. Tanimagan yoki endi ishlatilmaydigan qurilma yonidagi «Chiqarish» tugmasini bosing — o'sha qurilmada qaytadan kirish kerak bo'ladi. Bot va AI uchun tugma «Uzish» deb yozilgan.
Ro'yxatni har kim — do'kon egasi, administrator va xodim — o'z Profilida ko'radi. Do'kon egasi xodimining qurilmalarini ham ko'ra oladi: pastga qarang.
Kassa dasturida bu ro'yxat yo'q — kassa kompyuterini sayt yoki telefondan chiqarasiz.
Ro'yxatda nima ko'rinadi
Ro'yxat uch qismdan iborat (qaysi biri bo'lmasa, u chiqmaydi):
| Qism | Nima |
|---|---|
| Shu qurilma | Hozir o'zingiz o'tirgan qurilma — eng tepada, «Shu qurilma» belgisi bilan. Unda «Chiqarish» tugmasi yo'q: bu qurilmadan chiqish uchun odatdagi Chiqish ni bosasiz |
| Boshqa qurilmalar | Hisobingiz ochiq turgan boshqa kompyuter, telefon va brauzerlar. Sarlavha yonida «Hammasidan chiqish» tugmasi. Oxirida «Eski kirishlar (N ta)» qatori bo'lishi mumkin — dastur yangilanishidan oldin qilingan kirishlar, ular qaysi qurilmada ekanini aniqlab bo'lmaydi |
| Ulangan dasturlar | Do'kon egasining Telegram boti va AI yordamchi kalitlari — faqat egada bo'ladi |
Har qatorda:
- nomi — kassa dasturida kompyuter nomi, telefon ilovasida telefon modeli (masalan «Samsung SM-A515F», iPhone'da faqat «iPhone» yoki «iPad»), brauzerda brauzer va tizim (masalan «Chrome · Windows»). Telefondagi
m.topsavdo.uzham brauzer bo'lib ko'rinadi («Chrome · Android»); - turi — «Kassa dasturi», «Sayt», «Mobil ilova» yoki «Noma'lum qurilma» (turini aniqlab bo'lmagan kirish) va oxirgi marta qaysi IP manzildan ishlatilgani;
- «Kirgan:» — qachon kirilgani («bugun 09:00», «kecha 18:20», «12.10.2026»). Dastur yangilanishidan oldin kirilgan bo'lsa — «yangilanishdan oldin»;
- «Oxirgi marta:» — qurilma oxirgi marta qachon ishlatilgani (taxminan, bir necha daqiqa aniqlikda). Shu qurilmada — «Hozir ishlatilmoqda».
Telegram bot qatorida nomi «Telegram · @username», AI kaliti qatorida esa kalit nomi va uning boshlanishi (tsk_ab12cd34) turadi; ular uchun «Ulangan:» sanasi ko'rsatiladi.
7 kun davomida umuman ishlatilmagan qurilma ro'yxatdan o'zi tushadi — undagi kirish muddati tugagan, u yerda baribir qaytadan kirish kerak. Chiqish bosilgan qurilma ham ro'yxatdan darhol yo'qoladi (Chiqish internetsiz bosilgan bo'lsa — muddati tugaguncha qolishi mumkin, uni shu yerdan chiqarib yuboring). Kassa dasturi yoki telefon ilovasiga qayta kirsangiz, o'sha qurilmaning eski qatori o'zi yopiladi — takror qator qolmaydi.
Qurilmadan qanday chiqaraman?
- Qurilma qatoridagi «Chiqarish» ni bosing.
- Oyna qaysi qurilma ekanini yana aytadi — «Chiqarish» bilan tasdiqlang («Qolsin» — bekor qilish).
Kassa dasturini chiqarayotganda oyna qo'shimcha aytadi: yuborilmagan sotuvlar o'chmaydi, internetsiz ishlayotgan kassa esa internetga ulanganda chiqariladi (pastga qarang).
Telegram bot va AI kaliti — «Uzish»:
- uzilgan Telegram chatga do'kon xabarlari kelmaydi va bot u yerda hisobot bermaydi. Kerak bo'lsa Telegram sozlamalaridan yangi kod olib qayta ulaysiz;
- uzilgan AI kaliti darhol ishlamay qoladi — xuddi AI yordamchini ulash sahifasida bekor qilingandek. Kerak bo'lsa yangi kalit chiqarasiz.
Eski kirishlar qatoridagi «Chiqarish» ularning hammasini birdan yopadi. Bu qator dastur yangilangandan keyin 7 kun ichida o'zi yo'qoladi. Agar siz o'tirgan qurilmaning o'zi ham yangilanishdan oldin kirgan bo'lsa, eski kirishlar yopilmaydi («Eski kirishlar hozir yopilmadi…» xabari) — aks holda shu qurilma ham chiqib ketardi. Bir necha daqiqadan keyin qayta urinib ko'ring.
«Hammasidan chiqish» nima qiladi
«Hammasidan chiqish» — siz o'tirgan qurilmadan boshqa hamma qurilmadan chiqaradi: boshqa brauzerlar, telefonlar, kassa kompyuterlari va eski kirishlar. Shu qurilmada ishlashda davom etasiz. Boshqa brauzerlarga brauzer bildirishnomalari kelishi ham to'xtaydi.
Telegram bot va AI kalitlariga u standart holatda tegmaydi. Tasdiq oynasida «Telegram bot va AI ulanishlarini ham uzish» katakchasi bor — hisobingizga begona kirgan deb gumon qilsangiz, uni belgilang. Katakcha ulangan bot yoki AI kaliti bo'lgandagina chiqadi.
Chiqarilgan qurilmada nima bo'ladi
Chiqarish odatda darhol kuchga kiradi: o'sha qurilma serverga keyingi murojaatidayoq kirish sahifasiga qaytadi.
- Sayt (
my.topsavdo.uz) — kirish sahifasida «Siz bu qurilmadan chiqarildingiz yoki kirish muddati tugadi. Qaytadan kiring.» yozuvi chiqadi. - Telefon ilovasi va
m.topsavdo.uz— xuddi shu yozuv. Internetsiz kiritilgan yozuvlar o'chmaydi: «Yuborilmagan N ta yozuv shu qurilmada saqlangan — shu hisob bilan qayta kirsangiz yuboriladi.» - Kassa dasturi — kirish sahifasida «Siz bu qurilmadan chiqarildingiz yoki kirish muddati tugadi.» va ostida «Yuborilmagan N ta sotuv saqlangan — qayta kirsangiz yuboriladi.» (yuborilmagan sotuv bo'lmasa — «Qaytadan kiring.»). Server qabul qilmagan sotuvlar bo'lsa, yana bitta qator: «Yana N ta sotuv saqlangan, kirgach ularni ko'rib chiqing.»
Kassadagi sotuvlar yo'qolmaydi. Yuborilmagan sotuvlar kassa kompyuterida saqlanadi va o'sha kassir shu kompyuterda qayta kirganda o'zi yuboriladi. Kassaga boshqa xodim kirsa, ular uning nomidan yuborilmaydi — u ekran tepasida «N ta sotuv boshqa xodimda» belgisini ko'radi. Savatdagi tovarlar ham faqat o'sha kassir qaytsa saqlanadi. Batafsil: Internetsiz ishlash.
Internetsiz ishlayotgan kassa chiqarilganini darhol bilmaydi: u sotishda davom etadi va internetga ulangan zahoti chiqariladi. Bu ataylab shunday — internet yo'qligi sababli savdo to'xtamasin.
Bu bloklash emas: chiqarilgan qurilmada login va parol bilan yana kirish mumkin. Begona odam parolingizni bilsa, u ham qayta kira oladi — shuning uchun begona qurilma ko'rsangiz, chiqarib yuborgandan keyin parolni ham o'zgartiring.
Parolni o'zgartirsam nima bo'ladi
Parol o'zgartirilgan qurilmadan boshqa hamma joydan chiqiladi — xuddi «Hammasidan chiqish» kabi, lekin bunda Telegram bot ulanishlari va AI kalitlari ham doim uziladi. Parolni o'zgartirgan qurilma ro'yxatda o'sha qator bo'lib qoladi va ishlashda davom etadi. Batafsil: Parolni o'zgartirdim — boshqa qurilmalardan chiqib ketdi.
Faqat bitta qurilmani chiqarish uchun parolni almashtirish shart emas — «Chiqarish» yetadi.
Xodimning qurilmalarini qayerda ko'raman
Do'kon egasi saytda: Sozlamalar → Xodimlar → xodim qatoridagi amallar ustunida monitor va telefon belgisi («Kirilgan qurilmalar»). Oyna xodimning qurilmalarini xuddi yuqoridagidek ko'rsatadi — nomi, turi, IP, qachon kirgani va oxirgi marta qachon ishlatgani. Bitta qurilmadan «Chiqarish», yoki pastdagi «Hamma qurilmalardan chiqarish» bilan hammasidan.
- Bu ham bloklash emas — xodim login va parol bilan yana kira oladi. Ishlashini to'xtatish kerak bo'lsa, xodimni do'kondan chiqaring (Xodim ishdan bo'shasa).
- Tugma faqat do'kon egasida bor (administratorda yo'q). Javob kutayotgan, rad etilgan yoki bekor qilingan taklif qatorida u yo'q. Telefon ilovasida ega xodim qurilmalarini hozircha ko'rmaydi — faqat saytda.
- Do'koningizda nofaol (chiqarilgan) xodimning qurilmalari ko'rsatilmaydi: «Qurilmalar ko'rsatilmaydi».
Xodim boshqa do'konlarda ham ishlasa
Xodim boshqa egalarning do'konlarida ham ishlasa (ularning taklifini qabul qilgan bo'lsa), uning qurilmalari sizga ko'rinmaydi: oynada faqat «Bu xodim boshqa do'konlarda ham ishlaydi» yozuvi chiqadi. Sababi — u yerdagi kassa kompyuterlarining nomi, IP manzili va qachon ishlagani boshqa do'konning ma'lumoti. Bunday xodim qurilmalarini faqat o'zi o'z Profilida ko'radi va chiqaradi. O'z filiallaringiz bir nechta bo'lsa, ularning hammasi bitta ega hisoblanadi — xodimning qurilmalari ko'rinadi. Javob kutayotgan taklif hisobga olinmaydi. O'z do'koni bor odam (boshqa do'kon egasi) sizda xodim bo'lsa, uning qurilmalari ham ko'rinmaydi.
Shunday xodimni bir ega o'z do'konlaridan chiqarsa va xodimda faqat bitta ega qolsa, xodim barcha qurilmalaridan chiqariladi — qolgan egasining kassasidan ham. U qaytadan kiradi; kassadagi yuborilmagan sotuvlari saqlanadi. Bunday qilinishining sababi: aks holda qolgan ega xodimning avvalgi do'kondagi qurilmalarini (kassa kompyuteri nomi, IP) ko'rib qolardi. Batafsil: Xodim qo'shish va huquqlar.
Tez-tez uchraydigan savollar
Ro'yxatda tanimagan qurilmani ko'ryapman. Uni «Chiqarish» bilan chiqaring va parolni o'zgartiring (parol o'zgarsa boshqa hamma joydan chiqiladi). Qurilma nomini dasturning o'zi yuboradi va uni o'zgartirish mumkin — shuning uchun tanish nomga emas, «Oxirgi marta» va IP manzilga ham qarang.
Bitta brauzer ro'yxatda ikki marta turibdi. Brauzerda har kirish alohida qator bo'ladi: masalan Chiqish bosilmasdan brauzer tarixi tozalanib, keyin qayta kirilgan bo'lsa, eski qator ham qoladi. Eskisini (oxirgi marta ishlatilgani uzoqroq bo'lganini) chiqaring yoki kuting — 7 kun ishlatilmasa o'zi tushadi.
Ro'yxatni internetsiz ko'rsa bo'ladimi? Yo'q — ro'yxat har safar serverdan olinadi. Internet bo'lmasa «Ro'yxatni yuklab bo'lmadi» va «Qayta urinish» chiqadi: eskirgan ro'yxatni ko'rsatib «hammasi joyida» deyilmaydi.
Kirish qurilmalari haqidagi ma'lumot qancha saqlanadi? Tugagan (chiqarilgan yoki muddati o'tgan) kirish odatda 30 kundan keyin o'chiriladi; hisobga umuman qaytilmasa — 24 oydan keyin (Kirish tarixi qancha saqlanadi).