Skanerni qanday ulayman?

Qisqacha javob: Skanerni USB orqali ulang — u klaviatura kabi ishlaydi va alohida sozlash talab qilmaydi. Kassada qidiruv maydoniga kursor qo'yib skanerlang.

Ulash

1. Skanerni USB portga ulang;
2. Kompyuter uni klaviatura sifatida taniydi — drayver kerak emas;
3. Kassa dasturida qidiruv maydoniga kursor qo'ying;
4. Tovarni skanerlang — u savatga tushishi kerak.

Skaner ishlamayapti

1. Skanerning o'zi soz-mi? Bloknot (Notepad) oching va skanerlang. Raqam chiqsa — skaner soz, muammo dasturda. Hech narsa chiqmasa — skaner yoki kabelda.

2. Kursor to'g'ri joydami? Skaner raqamni kursor turgan joyga «yozadi». Kursor qidiruv maydonida bo'lishi kerak.

3. Skanerlagandan keyin Enter bosilyaptimi? Ko'p skanerlar kod oxirida avtomatik Enter yuboradi. Agar yubormasa, skaner sozlamasidan yoqish kerak (skaner qo'llanmasidagi maxsus shtrix-kod orqali).

Kod turiga qarab qo'shiladi

Skaner har doim bir xil ish qilmaydi — kod qaysi turda saqlangan bo'lsa, kassa o'shanga qarab qo'shadi: oddiy kod bitta tovar, blok kodi butun blok, kg/metr dona kodi bitta dona, bo'lak kodi esa bitta bo'lak (bo'lak narxida). Modal oyna ochilmaydi — bir skanerlash, bitta bo'lak.

Kod turi mahsulot kartochkasida beriladi: Mahsulot qo'shish.

Mijozning kartasini skanerlash

Skaner faqat tovarni emas, mijozning sodiqlik kartasini ham o'qiydi. Kartani odatdagi qidiruv maydoniga skanerlang — mijoz chekka biriktiriladi va ekranda «Mijoz: …» (ismi bilan) deb chiqadi. Alohida tugma bosish yoki ro'yxatdan qidirish shart emas.

Bu uchala ekranda ishlaydi: kassa dasturi, brauzerdagi kassa (pos.topsavdo.uz) va saytdagi Sotuvlar → Yangi sotuv. Ilgari u faqat kassa dasturida bor edi.

Tartib qat'iy: kod avval tovar deb qidiriladi (ekrandagi ro'yxat, shtrix-kod, artikul), faqat topilmasagina karta deb qaraladi. Ya'ni karta hech qachon tovarning o'rnini olmaydi.

• karta o'z do'koningizniki bo'lishi kerak — boshqa do'konning kartasi topilmaydi va odatdagi «topilmadi» xabari chiqadi;
• do'kon mijozga o'z plastik kartasini biriktirgan bo'lsa (raqami C bilan boshlanmasa ham) u ham xuddi shunday skanerlanadi;
• internet: kassa dasturi kartani kompyuterdagi bazadan topadi va internetsiz ham ishlaydi; brauzerdagi kassa va sayt kartani serverdan qidiradi.

Batafsil: Sodiqlik kartasi.

Faqat kassada emas — inventarizatsiyada ham

Skaner bilan qoldiqni sanash ham mumkin. Sanash sahifasida alohida skaner maydoni bor: kursorni o'sha yerda qoldirasiz va tovarlarni ketma-ket skanerlaysiz — har skan sanalgan miqdorga qo'shib boradi. Telefonda esa kamera skaner o'rnini bosadi.

Sanash joylar bo'yicha (ombor, savdo zali) ochilgan bo'lsa, skaner avval joy tanlangandan keyin chiqadi va skan shu joyning soniga qo'shiladi (joy «Tugatdim» qilingan bo'lsa skaner chiqmaydi — avval joyni qayta oching) — Ombor va savdo zalini alohida sanash.

Batafsil: Inventarizatsiya.

Markirovkali (aksiz) tovar — alkogol, dori, sut, suv

Aksiz tovarlarda oddiy shtrix-kod emas, markirovka (kvadrat DataMatrix kod) turadi. Uni odatdagidek skanerlang — tovar savatga tushadi.

Ichida nima borligini bilish shart emas, lekin bitta narsa muhim: markirovkada har bir DONA uchun alohida raqam bo'ladi, ya'ni kodning o'zi hech qachon takrorlanmaydi. Kassa kodning ichidan tovarning oddiy shtrix-kodini ajratib oladi va tovarni o'sha bo'yicha topadi.

Shundan kelib chiqadigan amaliy qoida:

• mahsulot kartochkasiga uzun markirovka kodini yozmang — u faqat bitta donaga tegishli va boshqa donada ishlamaydi;
• kartochkaga tovarning oddiy shtrix-kodini (qutidagi chiziqli kod) qo'shing. Markirovka shundan keyin o'zi ishlaydi;
• tovar topilmasa oyna sarlavhasi «Markirovkali tovar bazada yo'q» bo'ladi va ostida aynan qaysi qisqa kodni qo'shish kerakligi yoziladi — o'shani mahsulot kartochkasiga kiriting.

Markirovka ikkala kassada ham (kassa dasturi va pos.topsavdo.uz) bir xil ishlaydi. Kassa dasturida u internetsiz ham ishlaydi: kod ichidagi shtrix-kod kompyuterdagi bazadan topiladi.

Hozircha qamrovda emas: markirovkaning dona raqami hech qayerda saqlanmaydi, ya'ni «qaysi dona sotildi» hisobi yuritilmaydi. Bu kerak bo'lsa alohida aytish kerak.

Markirovka savatni buzmaydi

Markirovka kodining ichida ko'rinmas ajratgich belgisi bo'ladi (seriya raqamini ajratish uchun). Klaviaturada bunday tugma yo'q, shuning uchun skaner uni boshqa tugmaga aylantirib yuboradi — ko'p skanerlarda bu F8 bo'ladi, ya'ni kassadagi «savatni tozalash» tugmasi.

Ilgari shu sabab markirovkali tovar (yoki markirovka adashib) skanerlanganda savatdagi hamma tovar o'chib ketardi. Hozir bunday bo'lmaydi: skan davomida kelgan tugmalar e'tiborga olinmaydi va kod avvalgidek to'liq o'qiladi. Skanerni qayta sozlash SHART EMAS.

Xuddi shu himoya kursor miqdor/narx maydonida turganda va oyna ochiq turganda ham ishlaydi. Tugmalarni o'zingiz bosganda ular avvalgidek ishlaydi. Batafsil: Mahsulot sotish.

Skan savatga tushmasa

Skanerlangan kod savatga qo'shilmagan har qanday holatda kassa ekranida katta qizil oyna chiqadi: «Tovar savatga tushmadi» va ostida skanerlangan kodning o'zi. Oyna o'z-o'zidan yo'qolmaydi — sotuvchi skanerlaganda ekranga qaramaydi, kichik xabar esa ko'zga tushmay o'chib ketardi va tovar chekka tushmay qolardi.

Oyna «kod topilmadi» bilan cheklanmaydi — u rad etishning hamma sababini qamraydi va har biriga o'z matni va maslahati yoziladi:

Ekrandagi sarlavha	Qachon chiqadi
Bu shtrix-kod bazada yo'q	Kod hech qaysi tovarga biriktirilmagan
Tarozi yorlig'i tanilmadi	Yorliqdagi raqam bo'yicha tovar topilmadi
Bu tovardan omborda qolmagan	Qoldiq nol
So'ralgan miqdor ombordagidan ko'p	Ombordagi qoldiq yetmaydi
Ombordagi qoldiqning hammasi allaqachon savatda	Borining hammasi shu savatda turibdi
Blok sozlamasi to'liq emas	Tovarda blok hajmi (blokdagi dona yoki kg) yoki blok narxi yo'q
To'liq blokka qoldiq yetmaydi	Bir butun blokka qoldiq yetmaydi
Blok uchun qoldiq band	Qoldiqni savatdagi boshqa qatorlar band qilgan
Dona sotuv yoqilmagan	Tovarda bir donaning og'irligi yoki narxi yo'q
Bir dona uchun qoldiq yetmaydi	Qoldiq bir donaga yetmaydi
Bo'laklab sotish yoqilmagan	Tovarda bo'lak o'lchami yoki narxi yo'q
Bir bo'lak uchun qoldiq yetmaydi	Qoldiq bir bo'lakka yetmaydi
Markirovkali tovar bazada yo'q	Aksiz markirovkasi o'qildi, ichidagi shtrix-kod bazada yo'q
Qidirish yakunlanmadi	Internet uzilgan — kodni qayta skanerlang

Oyna ochiq turganda ham ishlash to'xtamaydi:

• keyingi tovarlarni skanerlash mumkin — ular savatga odatdagidek tushadi;
• kodni oynadan o'qib, tovarni nomi bo'yicha qidirish yoki egasiga aytish mumkin;
• bir kod bir necha marta skanerlansa, oyna almashmaydi — urinishlar soni ko'rsatiladi (×2, ×3);
• boshqa tovar o'tmasa, oyna yangisiga almashadi va «Bundan oldin yana N ta tovar savatga tushmadi» deb yozib turadi;
• oyna o'zi yopilmaydi — uni Ko'rdim, yopish (yoki Tushmagan skanlar) tugmasi yopadi. Sotuvchi skanerni tovarga tutganda ekranga qaramaydi, shuning uchun oyna ko'rilmaguncha turishi shart.

Tushmagan skanlar ro'yxati va nishoni

Qidiruv maydoni yonida sariq nishon paydo bo'ladi — ichida savatga tushmagan kodlar soni. Nolda u umuman ko'rinmaydi.

Nishonni (yoki oynadagi «Tushmagan skanlar» tugmasini) bosing — «Savatga tushmagan skanlar» ro'yxati ochiladi: vaqti, kodi, tovar nomi, sababi va necha marta urinilgani. Har qatorda «Qayta urinish» tugmasi bor: kod qaytadan skanerlangandek ishlanadi va muvaffaqiyatli bo'lsa qator yo'qoladi. Ro'yxat shu smenaga tegishli, smena yopilganda tozalanadi (brauzerdagi kassada sahifa yangilanganda ham).

Ogohlantirish oynasini o'chirish

Katta oyna standart holatda yoqiq. Xalaqit berayotgan bo'lsa uni do'kon sozlamasidan o'chirasiz: my.topsavdo.uz → Sozlamalar → «Kassadagi ogohlantirish» → «Tovar savatga tushmadi» oynasi. Tugmani faqat do'kon egasi va admin bosa oladi — kassir sozlamani ko'radi, lekin o'zgartira olmaydi.

O'chirilganda faqat OYNA yo'qoladi

Qolgan hamma narsa o'z holicha ishlayveradi:

• «Savatga tushmagan skanlar» ro'yxati to'lib boraveradi;
• qidiruv yonidagi sariq nishon va undagi raqam ko'rinaveradi;
• skan ovozi («buzz») chalinaveradi.

Ya'ni «o'chirdim — endi hech narsa ko'rmayman» degani emas: kassir tovar o'tmaganini baribir bilib turadi, faqat ekranni to'sib turadigan katta oyna chiqmaydi.

Sozlama har do'konga alohida. Kassa dasturi uni serverdan olib qo'yadi va internetsiz ham eslab qoladi; qiymat noma'lum bo'lsa (masalan dastur uzoq vaqt internetsiz turgan bo'lsa) oyna yoqiq deb hisoblanadi — qo'riqchi so'ralmagan holda o'chib qolmaydi.

Batafsil: Do'konni sozlash.

Skan ovozi

Savatga tushgani «blip», tushmagani «buzz» bo'lib eshitiladi — ekranga qaramay ham farqini bilasiz. Kassa dasturida ikkala ovoz Sozlamalar → Ilova da alohida yoqiladi-o'chiriladi, brauzerdagi kassada yuqoridagi «Ovoz» tugmasi ikkalasini birga boshqaradi.

Ovoz va oyna alohida sozlamalar — ataylab shunday. Oynani o'chirgan do'konda ham ovoz chalinadi, ovozni o'chirgan do'konda ham oyna chiqadi. Ikkalasi birga o'chsa kassir tovar o'tmaganini umuman sezmay qolardi.

Kod topilmasa — nimani tekshirish kerak

• Tovar yaqinda qo'shilgan bo'lishi mumkin — kassa dasturi serverdan yangilanishini kuting yoki internetni tekshiring;
• Shtrix-kod mahsulot kartochkasiga kiritilmagan bo'lishi mumkin;
• Tovarda ishlab chiqaruvchi kodi yo'q bo'lsa, o'zingiz kod berib stiker chop etishingiz kerak;
• Tarozi yorlig'i bo'lsa — Sozlamalar → Tarozi dagi prefikslarni tekshiring. Donali tovar prefiksi bo'sh bo'lsa donali yorliq oddiy shtrix-kod deb o'qiladi va topilmaydi. Yorliq turi tovarning birligiga ham mos kelishi kerak: kiloli yorliq faqat kiloli tovarga, donali yorliq faqat donali tovarga tushadi (Tarozi va PLU).

Batafsil: Mahsulot qo'shish.

Qaysi skaner mos keladi

Oddiy USB 1D (chiziqli) skaner yetarli — u shtrix-kodlarni o'qiydi. 2D skaner qo'shimcha ravishda QR kodlarni ham o'qiydi.

Simsiz skanerlar ham ishlaydi (ular ham klaviatura kabi ulanadi).

Keyingi qadam

• Mahsulot sotish
• Narx stikeri chop etish