Xodimlar hisoboti — kim nechta mijoz yaratdi?

Qisqacha javob: my.topsavdo.uz → Hisobotlar → Xodimlar. Tanlangan davrda har bir xodim uchun uchta raqam chiqadi: nechta mijoz yaratgani, nechta sotuv qilgani va shu sotuvlarning nechtasida mijoz tanlangani (va bu necha foiz ekani).

Bu sahifa faqat saytda (my.topsavdo.uz) — kassa dasturida va mobil ilovada yo'q.

Hisobot faqat ma'lumot beradi: dastur bu raqamlarni xodimning oyligi yoki mukofotiga o'zi bog'lamaydi. Rejani, mukofotni o'zingiz shu raqamlarga qarab belgilaysiz.

Jadvalda nima bor

Ustun	Nima ko'rsatadi
Xodim	Ism. Do'kon egasi yonida — «ega», ishdan chiqqan xodim yonida — «sobiq xodim» belgisi
Yaratgan mijozlar	Davrda shu xodim qo'shgan yangi mijozlar soni
Sotuvlar	Davrda shu xodim o'tkazgan sotuvlar soni
Mijoz tanlangan sotuvlar	Shu sotuvlarning nechtasida mijoz tanlangani
Ulush	Mijoz tanlangan sotuvlar barcha sotuvlarning necha foizi ekani

Jadval ostidagi «Jami» qatori — barcha qatorlar yig'indisi. Jami ulush umumiy sonlardan hisoblanadi (qatorlardagi foizlarning o'rtachasi emas): ko'p sotgan xodim jami foizga ko'proq ta'sir qiladi.

Ustun nomini bosib jadvalni shu ustun bo'yicha saralash mumkin — masalan eng ko'p mijoz yaratganlarni tepaga chiqarish uchun. Saralash «Jami» qatorini o'zgartirmaydi.

Summa bu yerda yo'q — faqat sonlar. Kim qancha pullik savdo qilganini Sotuv hisoboti → «Xodimlar» bo'limidan ko'ring. Ikki sahifadagi sotuvlar soni bir xil sanaladi.

Davr

Tepada davr tanlagichi: Bugun, Kecha, Shu hafta, Shu oy, O'tgan oy va yonida kalendar (o'z oralig'ingizni tanlash uchun). Sahifa birinchi marta Shu oy bilan ochiladi; keyin oxirgi tanlagan davringiz eslab qolinadi.

Kimlar ro'yxatda chiqadi

• Do'kon egasi va hozir ishlayotgan barcha xodimlar — davrda hech narsa qilmagan bo'lsa ham (nollar bilan). Ya'ni «bu oy umuman mijoz qo'shmagan» xodim ham ko'rinadi.
• Sobiq xodim (do'kondan chiqarilgan yoki hisobi o'chirilgan) — faqat shu davrda sotuv qilgan yoki mijoz yaratgan bo'lsa. Uning yonida «sobiq xodim» belgisi turadi. Xodimni chiqarish: Xodim ishdan bo'shasa.

Raqamlar qanday sanaladi

Yaratgan mijozlar

• Davrda qo'shilgan mijozlar sanaladi (qo'shilgan kuni bo'yicha).
• Mijozni kim qo'shgani yoziladi: saytda, telefondagi ilovada, kassa dasturida (internet bo'lmaganda qo'shilgani ham), Excel'dan import qilinganda (import qilgan odam), CRM'dagi lid mijozga aylantirilganda va Telegram botdagi mehmon «Mijoz qilish» bilan qo'shilganda.
• Keyin arxivlangan mijoz ham sanaladi — uni baribir shu xodim qo'shgan.
• Yetkazib beruvchilar sanalmaydi — faqat mijozlar.

Sotuvlar

• Bajarilgan va qisman qaytarilgan sotuvlar sanaladi.
• To'liq qaytarilgan sotuv va bekor qilingan chek sanalmaydi.
• Sotuv uni o'tkazgan xodimga yoziladi. Onlayn buyurtma (katalog, Telegram bot, ulgurji bozor) — buyurtmani bajargan xodimga.

Mijoz tanlangan sotuvlar

• Sotuvda mijoz tanlangan bo'lsa sanaladi.
• «Umumiy (kassa) mijoz» tanlangan sotuv mijozli hisoblanmaydi: u bitta odam emas, begona xaridlar yoziladigan umumiy yozuv (Mijoz qo'shish bo'limida «Umumiy mijoz (kassa uchun)» katakchasi).
• Davrda sotuvi bo'lmagan xodimning ulushi «—» bo'lib turadi — bu «0 %» emas: 0 % «sotgan, lekin birortasida mijoz tanlamagan» degani.

«Kim yaratgani noma'lum mijozlar»

Jadval ostida ba'zan shunday izoh chiqadi: «Kim yaratgani noma'lum mijozlar: 3 ta». Bular — davrda qo'shilgan, lekin kim qo'shgani yozilmagan mijozlar:

• bu imkoniyat qo'shilishidan oldin kiritilgan eski mijozlar;
• onlayn buyurtma (katalog, Telegram bot, ulgurji bozor) orqali o'zi qo'shilgan mijozlar — ularni xodim emas, buyurtmaning o'zi yaratadi;
• hisobi butunlay o'chirilgan xodim qo'shgan mijozlar (mijozlarning o'zi o'chmaydi — O'chirish va arxivlash).

Ular «Jami»ga kirmaydi. Davrda qo'shilgan barcha mijozlar = «Jami» qatoridagi «Yaratgan mijozlar» + shu izohdagi son. Bunday mijoz bo'lmasa, izoh chiqmaydi.

Faylga yuklab olish

«CSV yuklab olish» tugmasi ekrandagi jadvalni tanlangan davr bo'yicha faylga saqlaydi. Faylda har xodim uchun rol, faolligi va o'sha raqamlar, oxirida «Jami» va «Kim yaratgani noma'lum mijozlar» qatorlari bor. Ustun nomlari ekrandagi bilan bir xil. Faylni Excel yoki Google Sheets bilan ochish mumkin.

Kim ko'ra oladi

• Do'kon egasi — doim.
• Xodim — egasi unga «Hisobotlar bo'limini ochish» ruxsatini bergan bo'lsa (Xodimlar va ruxsatlar).
• Sahifa tarifdagi «Kengaytirilgan hisobotlar» moduli bilan ochiladi (Moliya hisoboti kabi). Modul tarifingizda bo'lmasa, menyuda «Xodimlar» bandi ko'rinmaydi.

Tez-tez uchraydigan savollar

Xodim mijoz qo'shgan, lekin jadvalda 0 turibdi. Davrni tekshiring — mijoz qo'shilgan kun tanlangan davr ichida bo'lishi kerak. Mijoz onlayn buyurtma orqali o'zi qo'shilgan bo'lsa, u xodimga emas, «Kim yaratgani noma'lum mijozlar» soniga tushadi.

Sotuvlar soni boshqa hisobotdagidan farq qiladi. Bu jadval to'liq qaytarilgan va bekor qilingan cheklarni sanamaydi. Tekshirish uchun xuddi shu davr bo'yicha Sotuv hisoboti → «Xodimlar» bo'limidagi sotuvlar sonini oling — u bilan bir xil bo'lishi kerak.

Ishdan chiqqan xodim ro'yxatda yo'q. Sobiq xodim faqat tanlangan davrda sotuv qilgan yoki mijoz yaratgan bo'lsa chiqadi. Davrni u ishlagan vaqtga o'zgartiring.