Tungi rejim
Obuna qanday ishlaydi?
Qisqacha javob: Topsavdo obuna asosida ishlaydi. Obuna holatini my.topsavdo.uz → Obuna bo'limida ko'rish mumkin. Narxlar topsavdo.uz sahifasida.
Obuna holatlari
| Holat | Ma'nosi |
|---|---|
| Sinov | Bepul sinov davri — barcha imkoniyatlar ochiq |
| Faol | To'lov qilingan, hammasi ishlaydi |
| Muddat tugashiga oz qoldi | Ogohlantirish ko'rinadi, ishlash davom etadi |
| Bloklangan | To'lov qilinmagan — yangi yozuv kiritib bo'lmaydi |
Obuna bloklangan bo'lsa ham ochiq qolgan narsani yopish mumkin: onlayn katalogni, ulgurji havolani va umumiy bazaga ulashishni o'chirish, ulgurji havolani yangilash (eskisi ishlamay qoladi) va mijozlar botini uzish.
Obuna hali ochilmagan bo'lsa
Obuna bo'limi «Obuna ma'lumoti topilmadi» degan yozuv bilan ochilsa, bu hisob uchun obuna hali ochilmagan degani. Nosozlik emas va yozuvlaringizga hech narsa qilmaydi — hisobni ochish uchun @topsavdo_call ga yozing. Saytda ham, mobil ilovada ham bir xil yozuv chiqadi.
Ilgari bunday hisobda ekran to'xtovsiz aylanib, chetda takroriy xatolik chiqib turardi. Endi sahifa tinch ochiladi; hisob do'konga umuman biriktirilmagan bo'lsa esa sababi va Chiqish tugmasi ko'rsatiladi — Tez-tez uchraydigan muammolar.
To'lov muddati tugasa nima bo'ladi
Ma'lumotlaringiz yo'qolmaydi. Lekin yangi sotuv, kirim va boshqa yozuvlarni kiritish to'xtaydi — hisobotlarni ko'rish esa mumkin bo'lib qoladi.
To'lovni darhol qila olmasangiz, @topsavdo_call ga yozing: hisobingiz to'lov va'dasi bilan bir necha kunga (odatda 3 kunga) ochib berilishi mumkin. Shu kunlar ichida to'lov kelmasa, yozish yana to'xtaydi. To'langan muddatingiz hali tugamagan bo'lsa, blokdan chiqarish uni o'zgartirmaydi.
To'lov qilingandan keyin hammasi darhol tiklanadi.
Tarifdagi mahsulot soni chegarasi
Tarifda mahsulot soniga chegara bo'lishi mumkin (qaysi tarifda qancha — topsavdo.uz sahifasida). Chegara bunday sanaladi:
- barcha filiallaringizdagi faol mahsulotlar birga sanaladi;
- arxivdagi (o'chirilgan) mahsulotlar va o'quv (demo) do'kon sanalmaydi;
- sinov davrida chegara yo'q.
Chegaraga yetganda yangi mahsulot hech qaysi yo'l bilan qo'shilmaydi — faqat Mahsulot qo'shish formasi emas:
| Qayerda | Nima bo'ladi |
|---|---|
| Mahsulot qo'shish, arxivdan qaytarish | Mahsulot qo'shilmaydi |
| Excel'dan import | Butun fayl qabul qilinmaydi. Xabar faylni tekshirish bosqichidayoq chiqadi va nechta mahsulot yana sig'ishini aytadi |
| Ulgurji hamkordan kelgan xaridda mahsulotni moslash («yangi mahsulot yaratish» yoki arxivdagi mahsulotni tanlash) | Moslash saqlanmaydi, xarid qabul qilinmaydi |
| Filiallar orasida ko'chirish (qabul qiluvchi filialda bu tovar yo'q yoki arxivda) | Ko'chirish bajarilmaydi |
Ochiq bozor (shop.topsavdo.uz) sotuvchi panelida mahsulot qo'shish | Mahsulot qo'shilmaydi |
Hech biri yarim bajarilmaydi: import, moslash yoki ko'chirish yo to'liq o'tadi, yo umuman yozilmaydi. Xabar «Tarifingiz chegarasi: maksimal … ta mahsulot» bilan boshlanadi.
Bir vaqtda bir necha xodim (yoki bir necha oynada) mahsulot qo'shsa ham chegaradan oshib ketmaydi: so'rovlar navbat bilan tekshiriladi, oxirgi bo'sh joyni birinchi kelgani oladi, qolganlari yuqoridagi xabarni ko'radi. Masalan, bitta joy qolganda Excel import va Mahsulot qo'shish ayni paytda yuborilsa — ulardan faqat bittasi o'tadi.
Nima qilish mumkin: keraksiz mahsulotlarni arxivlang (joy bo'shaydi) yoki tarifni yangilang. Mavjud mahsulotni tahrirlash, unga kirim qilish, sotish va importning «yangilash» rejimi chegaraga bog'liq emas.
To'lovni qanday qilaman
To'lovni karta orqali o'zingiz qilasiz — hech kim bilan bog'lanish shart emas:
my.topsavdo.uz→ Obuna bo'limini oching. Telefondan ishlasangiz —m.topsavdo.uz→ Yana → Sozlamalar → Obuna.- Tarif rejalari ro'yxatidan kerakli tarifni toping.
- Muddatni tanlang: 1 oy, 3 oy, 6 oy yoki 1 yil. Tugmada to'lanadigan summa darhol ko'rinadi.
- To'lash tugmasini bosing — Payme sahifasi ochiladi.
- Kartangiz ma'lumotlarini Payme sahifasida kiritasiz va tasdiqlaysiz.
To'lov tugagach qayerdan boshlagan bo'lsangiz, o'sha yerga qaytasiz (my.topsavdo.uz yoki m.topsavdo.uz) va obuna muddati uzayadi.
Telegram bot orqali
Do'kon botini ulagan bo'lsangiz, obunani botdan ham to'lay olasiz — saytga kirish shart emas:
- Obuna tugashiga 3 kun va 1 kun qolganda hamda tugagan kuni bot ertalab (soat 9 dan keyin) eslatma yuboradi. Har biri bir marta keladi. Sinov muddati tugayotganda ham shunday.
- Xabardagi tugmalardan muddatni tanlang: 1 oy, 3 oy, 6 oy yoki 1 yil. Bot to'lov hisobini ochadi va «Payme orqali to'lash» tugmasini yuboradi.
- Shu tugmani bosing va kartangizni Payme sahifasida kiriting. Hisob 24 soat amal qiladi — kechiksangiz, muddat tugmasini qayta bosing.
- To'lov o'tgach bot «✅ To'lov qabul qilindi» deb yozadi: qancha to'langani va obuna qaysi sanagacha uzaygani. Bu xabar saytdan yoki biz orqali (naqd, o'tkazma) to'laganingizda ham keladi.
Eslatmani kutmasdan ham to'lash mumkin: botga /obuna yozing (yoki menyudagi 💳 Obuna tugmasi) — obuna holati va to'lov tugmalari chiqadi.
Botdan faqat hozirgi tarifni uzaytirasiz. Boshqa tarifga o'tish — my.topsavdo.uz → Obuna. Tugmani faqat botga ulangan chatda bosish mumkin: xabarni boshqa odamga yuborsangiz, uning tugmasi ishlamaydi.
Play Market'dan o'rnatilgan ilovada to'lov yo'q
Telefonga Play Market'dan o'rnatilgan Topsavdo ilovasining Obuna bo'limida faqat joriy tarif, amal qilish muddati va foydalanish ko'rinadi — tariflar ro'yxati ham, To'lash tugmasi ham yo'q. Bu nosozlik emas: ilova do'konlarining qoidasi shunday. To'lash uchun telefon brauzerida m.topsavdo.uz ni yoki kompyuterda my.topsavdo.uz ni oching yoki Telegram botga /obuna yozing.
Karta ma'lumoti bizda saqlanmaydi
Karta raqami va SMS kodi faqat Payme sahifasida kiritiladi. Topsavdo ularni ko'rmaydi ham, saqlamaydi ham.
Tarifni o'zgartirish ham shu yo'l bilan: boshqa tarifni tanlab to'lasangiz, obunangiz o'sha tarifga o'tadi.
Eski tarifdan to'langan kunlaringiz qolgan bo'lsa, ular yo'qolmaydi — to'lagan pulingiz qiymatida yangi tarifga o'tkaziladi:
- Qimmatroq tarifga o'tsangiz, qolgan kunlar soni kamayadi. Masalan, 99 000 so'mlik tarifdan 60 kun qolgan bo'lsa va 599 000 so'mlik tarifga o'tsangiz, ulardan taxminan 10 kun qoladi (60 × 99 000 ÷ 599 000) va ustiga yangi to'lagan oylaringiz qo'shiladi.
- Arzonroq tarifga o'tsangiz, qolgan kunlar soni shu nisbatda ko'payadi.
- Sinov davridagi kunlar qayta hisoblanmaydi — ular bepul edi.
Xodimingiz ham obunani to'lashi mumkin, lekin faqat hozirgi tarifni uzaytiradi. Boshqa tarifga o'tishni faqat hisob egasi tanlaydi. Xodim hisob ochganidan keyin siz tarifni o'zgartirsangiz, o'sha hisobni endi to'lab bo'lmaydi — Payme «Hisob egasining tarifi o'zgargan» deydi va pul yechilmaydi. Xodim yangi hisob ochadi. Tarif aynan xodim Payme'da to'lov qilayotgan paytda o'zgarsa, to'lov qabul qilinadi, tarifingiz o'zgarmaydi, to'langan summa esa hozirgi tarifingiz narxi bo'yicha kunlarga aylantirilib obunaga qo'shiladi.
Korporativ tarif narxi kelishiladi, shuning uchun uni saytdan to'lab bo'lmaydi — @topsavdo_call ga yozing.
To'ladim, lekin obuna uzaymadi
Avval biroz kuting — bu odatda o'z-o'zidan hal bo'ladi.
To'lovdan keyin siz qaytadigan sahifa bankdan tasdiq kelishini kutadi. Tasdiq bir necha soniyada keladi, lekin ba'zan kechikadi. Shuning uchun sahifa darhol "bo'lmadi" demaydi — u javobni kutib turadi va kelishi bilan "To'lov qabul qilindi" deb yozadi.
Nima qilish kerak:
- Qaytish sahifasini yopmasdan bir daqiqacha kuting.
- Sahifada "Holatni yangilash" tugmasi bo'lsa, bosing.
- Telefonda bank ilovasiga o'tib qaytgan bo'lsangiz — sahifaga qaytganingizda u o'zi qayta tekshiradi.
- Kartadan pul yechilgan bo'lsa-yu, bir soatdan keyin ham obuna uzaymasa — @topsavdo_call ga yozing va to'lov vaqtini ayting. Bunday holatni biz o'zimiz ham kuzatib turamiz.
Ikki marta to'lab yubormang
Pul yechilgan bo'lsa, qayta to'lash ikkinchi marta yechilishiga olib keladi. Avval yuqoridagi qadamlarni bajaring.
Pulni qaytarish
To'lovni bekor qilish @topsavdo_call orqali ko'rib chiqiladi. Ikki xil qoida bor:
| Nima uchun to'langan | Qaytariladimi |
|---|---|
| Obuna muddati | Ha — qo'shilgan kunlar olib tashlanadi, pul qaytadi. Shu to'lov bilan tarif o'zgargan bo'lsa, oldingi tarif va qolgan kunlar ham tiklanadi |
| AI ballari — ishlatilmagan va o'sha kuni so'ralgan | Ha — ballar hamyondan olinadi, pul qaytadi |
| AI ballari — ishlatilgan | Yo'q |
| AI ballari — xarid kunidan keyin so'ralgan | Yo'q |
Xodimimiz to'lovni xato yozib qo'ygan bo'lsa (masalan, boshqa hisobga), u bekor qilinadi va obuna muddati shu to'lovdan oldingi holatiga qaytadi. Bizdagi hisobda yozuv o'chirilmaydi — bekor qilish alohida yozuv bo'lib qoladi.
Sababi: obuna — bu muddat, uni orqaga surish mumkin. AI ballari esa ishlatilganda haqiqiy xarajatga aylanadi (savolga javob berish uchun tashqi xizmatga to'lanadi), shuning uchun ishlatilgan paket qaytarilmaydi.
Ball paketi faqat sotib olingan KUNI qaytariladi
Muddat kalendar kun bo'yicha hisoblanadi (Toshkent vaqti), 24 soat emas. Kechqurun soat 23:50 da olingan paket yarim tundan keyin — hatto 10 daqiqa o'tgan bo'lsa ham — qaytarilmaydi, chunki kun almashgan. Shubha bo'lsa, xaridni bekor qilishni o'sha kunning o'zida so'rang.
AI yordamchi va ballar
AI yordamchi uchun so'rovlar ball bilan hisoblanadi. Korxona egasi Obuna sahifasida joriy oy uchun berilgan bepul ballarni, xarid qilingan balansni va mavjud AI ball paketlarini ko'radi.
Har faol obuna uchun har kalendar oyida 100 ta bepul ball beriladi; ishlatilmay qolgan bepul ball keyingi oyga o'tmaydi. Xarid qilingan ball esa hamyonda saqlanadi va muddati tugamaydi.
Ball paketini ikki yo'l bilan olish mumkin:
- Karta bilan to'lash — Payme orqali, obuna to'lovi bilan bir xil. Ballar to'lov tasdiqlangach darhol hamyonga qo'shiladi.
- Xarid so'rovini yuborish — boshqa yo'l bilan to'lamoqchi bo'lsangiz. Bu holda to'lov qo'lda tekshiriladi va ballar shundan keyin qo'shiladi.
Har javob ostida o'sha savol qancha ball turgani ko'rinadi. Savol odatdagidan qimmatga tushsa (ko'p ma'lumot o'qishga to'g'ri kelganda), yozuv rangi o'zgaradi va shu haqda eslatib qo'yadi. Javob xato bilan tugasa ball olinmaydi va hech narsa yozilmaydi.
Javob yozilayotgan paytda oynani yopsangiz (yoki internet uzilsa) javob to'xtaydi: AI o'sha paytda boshlagan qadamini tugatadi, yangisini boshlamaydi. Shu paytgacha haqiqatan bajarilgan ish uchun ball olinadi — odatda to'liq javobdan kam. Oyna AI ishga tushmasdan yopilsa ball olinmaydi.
AI yordamchi va ball xaridini faqat korxona egasi boshqaradi.